Бывае загарысься
якой-небудзь ідэяй, спрабуеш яе рэалізаваць, сутыкаесься зь перашкодамі,
памыляесься, але ўсё адно ідзеш далей, змагаесься зноў і зноў... Але раптам
хтосьці, хто, ты лічаш, абавязкова падтрымае тваю ініцыятыву ці прынамсі ня
будзе ёй перашкаджаць, бярэ і пляжыць яе па поўнай, прычым за тваёй сьпінай. І
рукі апускаюцца, бо не разумееш за што і навошта.
Упершыню я
сутыкнуўся з гэтым на другім курсе, калі мы стварылі суполку ў БДЭУ і неяк
крыва, па-дэлетанцку спрабавалі нешта зрабіць. Спачатку ўсё ішло добра,
ладзіліся імпрэзы, выдавалася газэтка, але на Міжнардны Дзень роднай мовы ў нас
адбыўся першы правал: тое, што мы заплянавалі і шырока разрэклямавалі –
забаранілі, адабралі памяшканьне. Безумоўна, мы былі расчараваныя, калі не
казаць болей, але ж усё адно разьлічвалі на посьпехі ў будучым.
Аднак тут нас
пачынае актыўна пляжыць на нефармальным форуме наргаса ананім: ды яны ніхто,
яны толькі шуму могуць нарабіць і больш на нішто няздатныя. Усё б нічога, калі
б раптам мы не даведаліся, што піша гэта наша знаёмая, якую мы лічылі калі не
паплечніцай, дык прынамсі аднадумніцай. І тут такое... Ёй мы нічога не сказалі,
але непрыемны ападак, як кажуць, застаўся...
Пасля гэтага
суполка пачала гаснуць. Дадаліся ўнутраныя сваркі і крыўды, і ў выніку суполка
зьнікла, не пражыўшы і году.
І вось зараз усё
паўтараецца. Толькі зьявіліся якіясьці дасягненьні і магчымасьці, як на табе:
вы нуль, кажа чалавек, які па родзе сваіх заняткаў, падаецца, мусіў бы цябе
падтрымаць. Але ж не. Навошта падтрымаць, калі лягчэй раскрытыкаваць за тое,
што ты робіш ня так? Да таго яшчэ й па-за вочы. Спадзяюся, на гэты раз "не
загаснуць зоркі ў небе".
Комментариев нет:
Отправить комментарий