Учора, 30 жніўня,
мой былы сусед па бабруйскім пад'езьдзе, а сёньня дэпутат пацёмкінскага
парлямэнту Анатоль Глаз прапанаваў скасаваць у краіне гімназіі і ліцэі,
паколькі яны "азаходніваюць" сыстэму навучаньня, адыходзяць ад
традыцыяў савецкае школы і дзеляць маналітнае грамадзтва на больш разумных і
менш разумных, а посьпехаў на алімпіядах не прыносяць. Пры гэтым ён прапанаваў
замест гімназіяў і ліцэяў ствараць у школах профільныя клясы, якія ня так даўно
былі з посьпехам у нашай краіне скасаваныя.
Безумоўна, у 21-м
стагодзьдзі жыць дасягненьнямі сярэдзіны 20-га і заклікаць да вяртаньня таго,
што разбурылася больш за 20 гадоў таму, – гэта вельмі па-беларуску. Гэтак жа як
і стрыгчы ўсіх пад адзін грэбень: стараных і гультаёў, адораных і звычайных,
разумных і глупых – ставараць у выніку маналітнае сярэднястатыстычнае
грамадзтва.
Ня ведаю, чаго
тут больш: неадукаванасьці, глупства, прыстасавальніцтва, настальгіі ці
звычайных дзіцячых комплексаў адносна тых, хто разумнейшы і больш здольны за
цябе. Ня ведаю, але Глаз далей за свой нос ня бачыць.
Так ужо
атрымалася, што мне ў свой час пашчасьціла навучацца і ў гімназіі, і ў ліцэі.
Спачатку ў шэсьць год я паступіў у Славянскую гімназію ў Бабруйску, якая была
найлепшай у горадзе. І менавіта паступіў, бо, каб патрапіць у першую клясу,
трэба было здаць іспыты. Гэтак жа іспыты мы здавалі і пераходзячы з чацьвёртае
клясы ў пятую. Пры гэтым ніякіх маральных траўмаў гэта, прынамсі мне, не
нанесла. Так, у нас увесь час кагосьці адсейвалі за непасьпяховасьць, але гэта
давала стымул астатнім вучыцца лепш. Тыя ж, хто пакідаў сьцены гімназіі,
часьцей за ўсё былі ў леку лепшых у тых школах, куды яны пераводзіліся.
Славянская
гімназія рэгулярна рыхтавала пераможцаў гарадзкіх, абласных і рэспубліканскіх
алімпіядаў. Для прыкладу, у 2003 годзе Бабруйск заваяваў на рэспулбліканскіх
прадметных алімпіядах два дыплёмы, і абодва іх атрымалі навучэнцы гімназіі: ваш
пакорны слуга па гісторыі і дзяўчына з 11-й клясы па гішпанскай мове. Пры гэтым
большасьць выпускнікоў гімназіі атрымліваюць вышэйшую адукацыю.
Пасьля 9-й клясы,
з другім дыплёмам па гісторыі, я кінуўся скараць беларускую сталіцу. Зноў
здаўшы іспыты (трэці раз за сваё 15-гадовае жыцьцё), паступіў у Ліцэй БДУ. Падрыхтоўка тут па профільных
прадметах была параўнальнай з навучаньнем у ВНУ, а адбор на рэспуліканскую алімпіяду
ў Ліцэі быў страшнейшым за яе саму, бо ўсе ведалі: калі ты прабіўся ў Ліцэі, на
"рэспубліцы" ты дакладна зоймеш месца. І так яно і было. У 10-й і 11-й
клясах амаль усе першыя месцы на рэспубліканскіх алімпіядах належылі ліцэістам
БДУ, усьлед за якімі ішлі прадстаўнікі гарадзенскага і магілёўскага ліцэяў. І
прычына гэтага ў тых ведах, якія мы атрымлівалі ў мурах нашае Alma Mater.
Але ж каму
патрэбныя разумныя і дасьведчаныя людзі? Вядома ж, лягчэй кіраваць статкам, які
на ЦТ ня можа набраць і сямі балаў.
Комментариев нет:
Отправить комментарий